Verlede week was Nasionale Skoonmaakweek, maar Eddy Ferreira het hom in die verlede al só vir mense wat mors vererg, dat hy geen aansporing nodig het om steeds hierdie dorp van alle rommel te verlos nie. Eddy is die man wat 'n span van 11 werkloses geleer het hoe om rommel raak te sien, op te tel en te verwyder. Met boskappers en pangas kap hulle die ruie bosse tussen bome op leë erwe oop. Dit kos hom maandeliks R15 000. "Gewoonlik word mense (as daar is) wat hierdie werk doen, deur die munisipaliteit besoldig. Maar ek hierdie spannetjie self. Dit is bevredigend, want hulle het lojaal en werk werklik hard". Hy sê mense dink hy word deur die munisipaliteit betaal. Eddy sê hy het die span op een punt van Komatipoort laat begin en hulle werk so al om die dorp om uiteindelik weer by die begin te eindig. Sy plan was dat sodra die spasies skoon is, die gras onder die bome met 'n spesiale grassnyer kort te hou. Talle inwoners was al verbaas om die rommelsakke wat hulle so ongeërg oor die muur of in ‘n leë erf gegooi het, wéér in hul eie oprit te vind... Of om die gemors wat hulle oorkant die pad agter die bosse gegooi het, wéér in hul eie garage aan te tref! Volgens Ferreira is rommelstrooiing teen die wet en sal hy dit as sulks beveg. Intussen het Alta Triegaardt van Pam Golding en Pierre Pretorius van Acacia Gastehuis ook hul gewig by Eddy se projek ingegooi en weldra gaan daar 'n komitee wees wat help om geld in te samel vir die "Komati Clean-up" projek wat pragtig momentum gekry het. 'n Hoogtepunt in die "Clean-up"- komitee se werk is die gholfdag van 24 September waaraan hulle lank beplan het en hoop om geld vir die aankoop van die spesiale grassnyer van bykans R360 000 bymekaar te kry. Tot dusver is die baan vir die vier-bal gholf byna vol maar daar is nog plek vir agterosse wat wil inskryf. Die komitee nooi die publiek om op hierdie dag sommer ook Nasionale Braaidag saam met hulle te vier. Teen laatmiddag sal daar vleis gebraai, allerhande soorte pap gaargemaak en bykosse bedien word deur Melonie Eva, bestuurder van Kambaku en lid van Eddy se komitee. Die ete kos R100 vir volwassenes en hoërskoolkinders en R50 vir laerskoolkinders. Alles gaan ten bate van die skoonmaak van Komatipoort. Om die kinders van rommelstrooi, herwinning en die groot veldtog bewus te maak, het 'n ander komiteelid, Magda Stronkhorst, kinders gekry om tekeninge te maak van hoe hulle die rommel en gemors in die strate sien. Hierdie "kunswerke" word tans gelamineer en sal as plekmatjies tydens die groot braai op die gholfdag dien. "Die komitee werk hard om mense van rommelstrooiing bewus te maak, en die meeste Komatipoorters werk pragtig saam. Dit sal voorwaar 'n skande wees as Komatipoorters weer begin mors nadat alles opgeruim is," het Ferreira gesê.

"This news item is brought to you by Fine and Country, Lowveld – South of Kruger, with the compliments of Corridor Gazette."