KOMATIPOORT - Die Voortrekkers wat tans spog met 90 lede, is 'n bedrywige kommando wat sommer drie groot projekte op een slag aanpak. Verlede Vrydag het die gr. 7’s in Pretoria gaan kwalifiseer vir hulle voorslag-kenteken, die hoogste kwalifikasie vir 'n Penkop en Drawwertjie (laerskoolleerders), terwyl die gr. 5’s en 6’e ('n gekombineerde span van 22 Penkoppe en Drawwertjies wat hulself die Rooiboskatte noem) die kampkook- en onthaalkentekens gedoen het. Die res van die kommando het tannie Bets du Toit van die Oos-Kaap wat die 1947 Komatipoort-gifmoord oorleef het onthaal. Die Rooiboskatte het aan huis van hulle offisier, Maritza Uys, 'n ete van ses vleisdisse, twee bykosse, slaai en nagereg op die vuur, gas en elektrisiteit voorberei. Die aand is hulle ouers daarop getrakteer tydens 'n viergang- aansit-ete. Geregte soos wildspastei, bobotie, frikkadelle, ribbetjies, hoender-op-die-spit, roosterkoek, patats-in-die-kole en melktert was op die spyskaart. Die trotse offisier het dit alles met behulp van haar eggenoot Piet van Dyk en 'n paar ouers gekoördineer. Terselfdertyd is die kinders meer geleer omtrent veiligheid in die kombuis, en dit was omtrent 'n verligting toe die kommando se kenteken-toetsoffisier en eregas van die aand, Lesley Kahts, verklaar het dat die kinders aan die vereistes vir die kentekens voldoen het. Die onthaal-kenteken vereis dat die kinders self die spyskaart beplan, die aankope doen, die gaste uitnooi, die geregte berei en dit voorsit. Daarna word die oorskiet versorg en die kombuis opgeruim. Daar was egter maar min oorskietkos omdat die gesinne van die kokke, wat hulle uitgehonger het vir die kinders se konkoksies, gou korte mette gemaak het met die smulgeregte. Wat oorgebly het, is die volgende dag aan minderbevoorregtes uitgedeel. Volgens Uys, het die span drie weke lank tydens kommando-byeenkomste gewerk aan die teoretiese deel en voorbereiding vir die kentekens. Die kinders het op 'n Komatipoortse lentedag, wat 40 grade gemeet het, effektief in spanne saamgewerk sonder enige probleme. Natuurlik het hulle tussen-in bietjie geswem ook, waarsonder die uitdaging uitmergelend sou gewees het. Die Rooiboskatte werk intussen hard om hul graadwielwerk af te handel, terwyl hulle eersdaags wegspring met die weerkunde-, sterrekunde-, sang-, kampeerder- en selfversorgingspesialisasies. Municipality Status: Committed